【室內外結婚場地】2018香港熱門會所婚宴場地TOP4排名|酒店或酒樓外的婚禮選擇‎

現代的婚禮場地,除了在教堂、酒店、酒樓舉行外,其實有不少新人都渴望於自然的美景下進行浪漫的婚禮,或者類似小法國的草原婚禮,價錢夠大眾化,近年都深受年輕人的歡迎。而這類型的婚禮,在香港大多數在會所場地舉辦,形式上以户外草地雞尾酒會為主,室內也有不同的風格。今次,編輯部綜合新人的評論,話你知全港最高CP值的高質會所婚宴場地。

 

第4位:會所一號 郵輪堤岸 ClubONE

 

新人評價:3,000呎大堂 + 地方偏遠但有接駁巴士

「睇咗九龍東嗰間ClubONE同埋九龍灣嗰間ClubONE,但係覺得兩個場地都唔係咁靚。之後老公話不如順便睇埋郵輪嗰間,點知一睇就覺得好靚,個Reception好大,個場地又好grand。雖然地方係偏遠咗少少,但compare之前睇嗰兩間,我覺得係值得嘅。而且佢有shuttle bus,我覺得方便…」

詳細評論及價錢參考:按此

 

新人評價:CP值高 + 樓底高 + 完善宴會設備

「酒樓可能會令人覺得唔夠高檔次,但酒店預算又太高,所以都係傾向搵會所嗰類場地。上網睇到ClubONE郵輪堤岸都覺得幾鐘意,而且價錢比較公道,加上我家姐之前喺ClubONE德藝會度擺酒,我覺得ClubONE啲嘢食同埋啲人都跟進得OK,所以就無乜再睇其他… ClubONE個screen真係好大,好似電影院入面嗰啲隔離2邊有簾,中間就係好大塊布幕嗰種,嗰度樓底都好高。我睇場嗰時其實都無考慮過,所以到播片嗰時到見到畫面好清,啲音響同聲又正又夠清楚,都好開心!」

詳細評論及價錢參考:按此

 

第3位:one-thirtyone 西貢

 

新人評價: 藍天為證草地婚禮

「One Thirty-One係西貢海邊,有海景又有草地,整體環境好舒服,就決定喺呢度證婚。除咗One Thirty-One,我哋仲租埋隔離樓下個農場夾埋一齊做場地,空間感好夠大…」

詳細評論及價錢參考:按此

 

第2位:四季薈 My season My Day

 

新人評價:本身個場好靚,而且location好方便

「我地一開頭其實都無諗住擺酒,到後來真係要擺嘅時候就想啲地點較方便。之後咁啱搵到My Day,見佢地係新裝修,入面唔需要我地點樣佈置都已經好靚,而且location好方便,地鐵直接去到… 」

詳細評論及價錢參考:按此

 

新人評價:細心照顧(包印囍帖+Live Band+其他配套)

「另外佢地啲配套都盡量配合返我地,佢地本身係包埋律師證婚嘅,但因為我地會去教堂行禮證婚,所以佢地都有幫我地轉返其他服務。佢地都有提供photo booth 呀、餐前小食,咁都好好有額外做多過本身寫嘅3甜3咸,最後都應該有7-8樣食物。同埋佢地都有包埋印帖…出嚟嘅效果都好嘅,亦都有送名牌俾我哋。」

詳細評論及價錢參考:按此

 

第1位:會所一號 科學園 ClubONE on the PARK

 

新人評價: 好滿意!Backdrop唔洗花錢再整過

「佢有個新娘保母嘅妹妹跟住我,都會提我要做啲咩,拎漏咗花球又會幫我,都幾好。作為過來人,我覺得揀場地,自己鍾意真係好緊要,無謂揀個自己唔鍾意嘅。總有啲人係長輩覺得想中式就揀中式,但呢啲其實都係自己嘢,要揀自己鍾意嘅。」

詳細評論及價錢參考:按此

 

新人評價:室內/室外證婚都得!

「我之前去過尼到飲,都幾中意佢地個場地,覺得整個design好好,樓底夠高,地方夠大。加上我地要擺成38圍,都算多,其實香港唔係好多地方可以揀,所以就決定揀尼間ClubONE。佢地嘅staff係事前同我地傾都係有問必答,事前亦都會出哂reminders俾我地跟住去準備…」

詳細評論及價錢參考:按此

圖片來源:相關機構, Simply Serenity Wedding Decoration

撰文:May

分類: 
婚禮籌備

【新郎結婚禮服】男禮服5大攻略 | 告別黑白灰款式!莊嚴和「娘」味只係一線之差...

唔準諗,即刻答,十個新郎哥十套西裝乜嘢顏色多? 我相信大家都係答「黑」。點樣可以喺一眾都係著黑色西裝嘅兄弟、酒店部長同賓客入面突出自己係主角? 唔使認錯人咁尷尬!?唔使用劍嘅!今日教大家喺顏色、身型、身高、款色同場地,只要一個決定,就可以成為耀眼主角!

 

01. 身型、身高:小心顯肥!

結婚呢個大日子,莫講講女士,其實男士都一樣會做運動keep fit,但往往披左件西裝褸之後,個人就好似縮細左一個圈咁,所以揀男禮就要好小心喇!身型比較有肉地嘅男士,盡量唔好著啲比較鮮色嘅西裝,例如係紅色、黃色,因為鮮色會令人視覺上望落橫啲。但相反瘦底嘅男士就唔好揀啲相對貼身嘅款色,如果唔係視覺上就好易變成竹籤,分分鐘瘦過新娘子就唔好睇喇。另外矮細嘅男士要留意,我老公當時就係因為貪靚,揀左蝙蝠袖,諗住好型成個賭神咁,點知影相出黎就矮左成個頭,真係慘慘豬… 所以揀男禮絕對要睇住自己嘅身型去配合咁先Good Fit 㗎!

 

02. 顏色、款色:告別黑白灰!

「黑、白、灰」我自己平時都著唔少!但大日子又要型又要突出,係時候要拋開呢啲沉悶嘅顏色喇!其實近年大吹韓風同英倫風,顏色上嘅選擇已經愈嚟愈多。好似同黑色一樣咁穩陣嘅深藍色配襯卡其色褲,充滿外國風情嘅百搭啡色配灰色。

有喜慶感覺,又唔會俗套嘅酒紅色,都係搶眼嘅配搭。

款色嘅選擇方面,男禮已經進化到好多Details,等人一望就注視到新郎哥。例如:質地上,個人推薦女性常用嘅布料,佢地嘅精緻度同Details都比男性布料多選擇,唔再局限於斜間或暗紋。而婚期喺年尾呢啲結婚旺季,襯天氣涼涼地,就可以選擇相對厚身少少嘅針織馬夾,而格仔紋嘅西裝亦係經典款式呢!

 

03. 小配件:造型小亮點

另外小配件亦不容忽視,好似煲呔、領巾、呔夾同帽,多個吸睛位亦唔太浮誇。我老公呢件BIG DAY西裝雖然係黑色,但佢分別用上唔同嘅布料去做配搭,新潮之餘亦喺膊頭上加入一隻小天鵝裝飾,呃到唔少LIKE呢!

 

04. 場合

顏色、款色揀好之後,唔好以為就萬無一失。因為配襯場地亦都係非常重要,例如:你唔會選擇著住尾燕服喺沙灘證婚一樣,避免「對的衣服,遇著錯的場地」! 新郎們,記緊以下TIPS呀!

 

A. 田園風 – 近年大熱主題

因為處身大自然,所以新郎哥可以選擇一啲相對輕鬆同淺色嘅西裝配搭。而下身亦可以配襯淨色波鞋,輕鬆自然咁享受樹木同綠草嘅清新氣息。

 

B. 教堂式

神聖同莊嚴嘅教堂係唔少新娘子自幼幻想嘅結婚地點,所以新郎可以揀一啲比較斯文同莊重嘅款式。如:燕尾服、韓式禮服亦相對適宜。

 

C. 酒會式

彷似身處外國場地嘅酒會,近年深受唔少新人嘅喜愛。輕輕鬆鬆同最愛嘅親朋好友狂歡傾計,所以禮服上面嘅元素就可以傾向英倫風嘅Casual wear,甚至可以玩味感重一啲!

 

05. 循環再用

講到呢到,就算揀幾靚幾突出嘅西裝都係結婚當日用,好多男士都會拋出一句:「之後都用唔番,唔使搞咁多野啦,簡單咪得囉!」有見及此,而家好多鋪頭設有修改禮服嘅服務。只要新郎哥係訂造西裝前,同負責人講想件禮服日後著得番,佢地就會將恤衫預先加一啲鈕扣,方便完婚後將禮服嘅蘋果領改為活動領。若果你著日式燕尾服,日後亦都可將後面的剪裁裁返短,咁就唔會做成浪費喇!

撰文:駐場Blogger - 人妻搜記

圖片來源:駐場Blogger - 人妻搜記、明星發相

分類: 
婚禮籌備

【婚禮當日攝影】2018香港婚禮攝影TOP 4排名 | 新人真實評語:唔好貪平,最高質係…

籌備結婚嘅時候,好多師姐會話結婚當日攝影師真係好重要,Pre-Wedding影得差可以再影過,但一生人入面,結婚大日子只有一次,當日影得差,出嚟嘅效果係婚禮災難照,誇張啲講真係「人生污點」。當然,Pre-Wedding影得好嘅攝影師唔代表喺Big Day當日都影得好。編輯根據一眾新人的評分,精選了全港Top 4婚禮攝影名單,好值得大家參考。

 

第4位  : TcTang Image House

新人評價:態度好,捕捉到重要時刻,勤力嘅攝影師!

「影Pre-Wedding 好夾,服務態度好,所以Big Day都揾返佢影。Big day當日,我覺得佢好似好了解Four season個場,完全知道晒邊個位影相靚!之後我啲姊妹話返比我聽,原來當我做緊makeup既時候,佢襯空檔時間周圍搵靚位,到我搞掂手頭上既野就即刻捉我去影相,佢係無一分鐘停低既!另外,之後睇返啲相同video就見到佢捕捉到好多moment,爸爸媽媽既喊樣都capture到,因為我make speech既時候就喊得好勁,台下既人都有喊,佢都捕捉到呢啲時刻,Terence話連自己都有喊…」

新人評價:唔會佔客人便宜,好為客人著想!

「原本我係搵其他公司影pre wedding既,但有少少不愉快經歷,後來咁啱我同事個妹就識Tc,就叫我不如去試下。之後我就同我未婚夫上去睇,溝通完之後感覺都幾好,佢份人好均真,唔會話想呃你錢!返屋企諗咗一陣就決定揀佢地…」

詳細評論及價錢參考:按此

 

第3位  : Viwa Production

新人評價:配合不同習俗的新人,額外送花絮片

「花左好多心機去令到我地騰出到少少時間係屋企附近影外景,D相影得好warm好family,我係超appreciate。除左條same day edit拍得好warm,佢地仲額外送多左個服務比我地,就係將個日一D花絮拍成一條片送比我,話係比新娘既surprise…」

新人評價:對香港外景好熟悉

「因佢哋係幾有口碑嘅production,加上睇咗佢哋做wedding嘅job都唔錯,所以自己都揀咗佢哋。我講完我嘅concept,個攝影師已經好清楚掌握到我想點,例如我想要D大自然feel d嘅相同埋影我彈結他,咁佢哋好快提議去到海邊喥影可以影到romantic嘅感覺,呢D就係佢哋累積經驗而好快比到我嘅suggestion,我覺得佢哋對於香港外景同點掌握客人口味做得好好…」

詳細評論及價錢參考:按此

 

第2位  : HW Motion Story

新人評價:每條片都好獨特!價錢合理

「佢地會首先聽下我地嘅故事,又會搵好多reference嘅片俾我地睇同參考,感覺佢地都係唔想做到條條片一樣,而係真係會花心機去為每對新人預備。好專心咁執自己啲片,佢真係會趴哂係度幫我地影,認真「瞓身」!而且本身我地嘅rundown都已經好chur,佢地都無咩時間抖,得半個鐘食飯,但佢地為左幫我地影多啲,就連個好短嘅食飯時間都cut埋去…」

新人評價:人生無悔!聽到先生的心底話

「出來嘅早拍晚播我自己都好滿意,特別係出門嗰時,佢哋引導到我哋講到心裏面嘅說話,拍出嚟真實得嚟又好感動。佢哋嘅time control做得好好,而且好識捕捉我同我先生嘅互動,亦帶動咗成個拍攝氣氛,唔會出現dead air…」

詳細評論及價錢參考:按此

 

第1位  : Ivan Wong Photography

新人評價:教人擺Pose!老婆好滿意當日個妝

「影個日Ivan態度好好,會好有耐性教我地擺好多款唔同既post,我地之前都有去日本搵另一間影,咁Ivan比較上就會多好多動作建議,而且都好細心,又會係攰既時候氹我地笑!個化妝師有幫我修下眉,而老婆個妝都化得佢好滿意…」

新人評價:朝拍晚播剪接出色

「態度好好,好正面,我問佢D價錢佢都好直接講個收費係點,無話會逐樣加錢,全部都好透明同順利!佢地超準時,仲要係早到個隻,我都無expect出來個效果好成咁,可以咁感動,D鏡頭好smooth,同埋D sound mix都好配合條片…」

詳細評論及價錢參考:按此

圖片來源:攝影師專頁、新人評論

撰文:May

分類: 
婚禮籌備

【2018人情公價參考】酒店、酒樓、午宴應俾幾多?「公價 5 嚿」已成過去式!

投身社會工作後,除了收到稅單之外,適逢現正是八十、九十後的結婚潮,「紅色炸彈」(收喜帖)幾乎一年收幾次。未婚要送人情,已婚要還人情。相信最多人關心的就是收到紅色炸彈之後,究竟結婚的人情應該畀幾多才合理?編輯今次就話你知2018年人情的參考價啦!

編按:文章的價錢單位,全以港幣(HKD)為基礎。

 

【2018人情公價】「人情公價 5 嚿」已成過去式!

 

酒店場地 人情價相若

高級酒店($1,200)VS一般酒店($1,100)的價錢變得貼近,雖然都要盛惠你過千元大利是,不過兩者的金額距離縮細,只是相差 $100。

 

會所場地新潮流

會所也是新興的婚宴場地,不過其人情價也不平,比得上酒店的價錢。

 

酒樓人情價  邁向$1,000大關

一般酒樓維持在 $800的水平,而高級婚宴酒樓步步進逼$1,000大關,今年人情價上升至$900。

 

Cocktail Party 入場費漲至$600

近幾年不少新人崇尚一切從簡,以午宴代替晚宴。不論是中式抑或西式的午宴飯局,人情指標與去年一樣,都是$600。而在坊間漸具人氣的Cocktail Party﹙雞尾酒會﹚的入場費也由$500漲價至$600,由此可見,「人情公價 5 嚿」的時代宣告結束!

當然大家要留意返,這裡所指的「公價」都只是個市場參考的指標。說到底「人情」是一份心意,祝福主人家成家立室。而新人亦不應濫派帖,「奉旨」要賓客為你的婚事「回本」,切忌只為填補人數而強人所難 。

圖片授權:TcTang Image House

摘文:May

 

分類: 
婚禮籌備

【婚攝要留意】「婚紗攝影」VS「婚禮攝影」的4大差異!

很多新人在籌備婚禮的時候,計劃由婚紗到Big Day的拍攝,用同一個攝影師就得、甚至想請朋友幫忙就可以了,反正都是影結婚相,應該沒什麼差別吧… 其實這樣想就大錯特錯了!因為「婚紗攝影」和「婚禮攝影」完全是兩樣不同的攝影範疇,新人在選擇婚紗及婚禮攝影師的時候,記得要望清楚,今日由編輯介紹一下兩者的差異吧!

 

「婚紗攝影」VS「婚禮攝影」的4大不同

 

01. 「婚紗攝影」是按住劇本走!

每每提及影婚紗相,雖然是不少女人的夢想畫面,但是男士的口裡說無所謂,內心都暗暗地想型番次,所以影婚紗相是結婚不少得的環節。通常影婚紗相,不管是室內還是室外,當日的流程是造型師為新娘化妝、為新郎 打扮,到場後新人的動作都是set好了,擺好pose後,攝影師完成最完美的構圖。

02. 「婚禮攝影」不可以NG

影婚紗相期間,假若不小心捕捉到新人眨眼、有蟲飛過、沒對到焦的畫面時,都是可以重新來過。至於「婚禮攝影」是大的難度是

「影婚紗,可以重擺pose;影婚禮,不可以NG!」

因為大婚當日,全日的流程好長,所有動作都要快而準!不可能話,新娘在奉茶時,姿勢不好看,重新來一次。戴戒指時,攝影師被親友擋到沒拍到,重新戴一次,都是根本不可能的事啊!而即時的情感也是在這分秒間流露出來,所以,婚禮攝影師要準確地捕捉到一霎那的靚相。

03. 「婚紗攝影」的風格多元化

正正因為婚禮攝影受現場環境的限制,不少新人都希望婚紗攝影都影得完美和與眾不同。因此,有些新人就喜歡選址到他們的秘密基地、邂逅的地方、或海外拍攝。拍外景時遇到的考驗也不少,要好好的掌握光線、角度,才令這張相別具意義,非常考驗攝影師的經驗值。

04. 婚禮攝影師經驗愈豐富愈好

畢竟婚紗相可以重拍,但是婚沒有人想要結第二次呀!其實選擇攝影師方面也要注意,參加過百場的專業婚禮攝影師,絕對是比新人們更瞭解婚禮內容,事前先跟新人溝通過整個儀式流程、拍攝的重點,也會適當的引導新人及親朋好友流程,根據經驗去捕捉新人永恆的瞬間。

當然世上也會有兩種都很擅長的攝影師,所以在影結婚相選擇攝影師的時候,要多多參考不同的婚攝作品。結婚本是甜甜蜜蜜的事,新娘和新郎都要共同參與這件事,減少籌備婚禮時的爭執,祝大家有個愉快的婚禮。

圖片授權:Ivan Wong Photography 

撰文:May

分類: 
婚禮籌備

頁面